အကယ်လို့များ….. ဒါတွေကို သင်ခံစားရတယ်ဆိုရင်…
- လူတွေက သင့်အပေါ်အနိုင်ကျင့်တာ ခံရတယ်။
- သင်ရသင့်ရထိုက်တဲ့ အခွင့်အရေးတွေကို ကဖျက်ယဖျက် လုပ်ခံရတယ်။
- အပြောင်းအလဲလုပ်ဖို့ ကောင်းခြင်းတွေကို တားဆီးပိတ်ပင် ခံရတယ်။
- အရှုံးတွေ၊ ဝေဖန်တာတွေပဲ ပြောပြီး သင့်ဘဝကို စိတ်ပျက်စေတယ်။
- သင်လုပ်ခဲ့တဲ့ အမှားတွေကို ပြန်ဖော်နေပြီး သင့်ကိုယ် ရှက်စိတ်၊ သိမ်ငယ် စိတ်ဖြစ်အောင်လုပ်တယ်။
- မှားယွင်းတဲ့ ရွေးချယ်မှုတွေ ဖြစ်လာအောင် ဖိအားပေးခဲ့ပြီး သင့်ကိုယ်သင် စိတ်ပျက်အောင် လုပ်ခဲ့တယ်။
- သင့်ဘဝမှာ ဘာမှ ဖြစ်မလာခဲ့တဲ့ အရာတွေနဲ့ပဲ သင့်ကို စိတ်သောကရောက်အောင်လုပ်တယ်။
………….. အဲဒီနောက်မှာတော့ သင်ဟာ အရှုံးတွေနဲ့ လူတစ်ယောက် ဖြစ်သွားခဲ့ပါပြီ။ အချိန်တိုင်းမှာ လူတိုင်းလိုလို ဒီလို ပြဿနာတွေ ခံစားနေရတယ်။
သူရဲကောင်းတစ်ယောက်က ဘယ်တော့မှ သူ့ကိုယ်သူ သူတစ်ပါးရဲ့ ထိန်းချုပ်တာ မခံခဲ့သလို ကိုယ့်ကိုယ်ကိုလည်း ကန့်သတ်မထားပါဘူး။
လူတွေ သင့်အပေါ် အနိုင်ကျင့်ကြတာက သင်ကိုယ်တိုင်က လက်ခံခဲ့လို့ပါ။ အဲဒီလို ပြောလိုက်လို့ စိတ်ထဲ ရှုပ်ထွေးမသွားပါနဲ့။ ကိုယ့်ကိုယ်ကို ပိုင်ပါတယ်။ ဒါပေမယ့် လူတွေက ကိုယ့်ကိုယ်ကိုထက် သူများကို ပိုအားကိုးလိုတဲ့ စိတ်ကြောင့် ၊ သူများလွှမ်းမိုး ခံလိုစိတ်တွေ ကြောင့် ဖြစ်ရတာပါ။ သင့်အပေါ် အနိုင်ကျင့်တာကို သင်လက်မခံရင် ဘယ်သူမှ သင့်ကိုယ် အနိုင်မကျင့်ရဲပါဘူး။ အစရှိ နောက်နောင်တဲ့။ စ လာကတည်းက သွေးတိုးစမ်းတယ် ဆိုတာကိုတောင် လက်မခံပါနဲ့။ ပညာရှိသား ယဉ်ပါးစွာနဲ့ ယဉ်ကျေးစွာ ငြင်းဆိုပါ။ "ခွင့်ပြုပါခင်ဗျာ၊ ဒါမျိုး ကျတော် လက်မခံနိုင်ပါဘူးခင်ဗျာ။" ၊ "စိတ်မရှိပါနဲ့ ဒါမျိုး ကျမ မနှစ်သက်ပါဘူး။" စတဲ့ ယဉ်ကျေးပျူငှာတဲ့ စကားလုံးတွေနဲ့ ငြင်းဆိုလိုက်ပါ။ သင့်ကိုယ်သင်မှ မချစ်ရင် ဘယ်သူမှ သင့်ကို ချစ်မှာ မဟုတ်ပါဘူး။
ကိုယ့်ရဲ့ ကိုယ်ပိုင် အခွင့်အရေးတွေ၊ အလုပ်မှာ ရထိုက်တဲ့ အခွင့်အလမ်းတွေကို ဘယ်အရာတွေကမှ ပိတ်ပင်တားဆီးတာကို လက်မခံပါနဲ့။ ပြတ်သားပါ။ ရဲရင့်ပါ။ အားလုံးကို ရိုးသားမှန်ကန်စွာဖြင့် တောင်းဆိုရဲတတ်ပါစေ။ ကိုယ်ပိုင် အခွင့်အရေးဆိုတာ အစကတည်းက ကိုယ်ပိုင်ဆိုင်တဲ့ အခွင့်အရေးပါ။ ဘယ်သူမှ လွှမ်းမိုးချယ်လှယ် သြစာလွှမ်းတာကို ခံယူစရာမလိုပါဘူး။ ဂါဝရ တရားနဲ့၊ အကြောက်တရားကို ကွဲပြားသိတတ်ဖို့ အရေးကြီးပါတယ်။
ပြောင်းလဲဖို့ အချိန်တန်ပြီဆိုရင် ပြောင်းလဲဖို့ ကြိုးစားပါ။ ဘယ်သူမှ လွှမ်းမိုး မခံပါနဲ့။ ကိုယ်ကိုယ်တိုင်သာ ကိုယ့်ဘဝကို ချယ်လှယ်ပါ။ အနိုင်ကျင့်တယ်၊ အနိုင်ကျင့်ခံရတယ်ဆိုတာ နှစ်ခုလုံး မကောင်းပါဘူး။ နိုင်နေတုန်း ပြုံးပျော်နေသလို အရှုံးကိုရော ပြုံးပျော်နိုင်အောင် ကြိုးစားနိုင်ပါစေ။
ကိုယ့်ဘဝ အတွက် ကိုယ်လုပ်စရာရှိတာလုပ်နေချိန်မှာ ဘေးပတ်ဝန်းကျင်က ဝေဖန်နှောက်ယှက်သံတွေကို မကြားအောင်၊ ကြားလည်း နားစိုက်ထောင်စရာ မလိုအပ်ပါဘူး။ ဝေဖန်မှုတစ်ခုကြောင့် အားအင်ယုတ်လျော့တာ ခံမယ့်အစား ကိုယ့်ကိုယ်ကို အားကစား တစ်ခုခုလုပ်လိုက်ပါ။ အားကုန်တာချင်း အတူတူ အကျိုးရှိမယ့် အားကုန်တာက ပိုမကောင်းဘူးလား။
လူတိုင်းအမှားမကင်းပါဘူး။ အမှားကင်းတဲ့သူလည်း မရှိပါဘူး။ အမှားတွေကိုပဲ ဆက်ကာဆက်ကာ တွေးနေမယ်ဆိုရင်တော့ တစ်သက်လုံး အမှားသံသရာကကို လွတ်မယ် မထင်တော့ပါဘူး။ အဓိကအရေးကြီးတာက အမှားတွေလုပ်တိုင်း စိတ်ဓါတ်မကျလွယ်ဖို့နဲ့ သင်ခန်းစာ ယူတတ်ဖို့ပဲ အရေးကြီးပါတယ်။
စိတ်ဓာတ်ကျပြီး တွေဝေနေတဲ့ လူတစ်ယောက်အစား၊ ဘာဖြစ်ဖြစ် ရင်ဆိုင်မယ်ဆိုတဲ့ တိုက်ပွဲဝင်သူရဲကောင်း တစ်ယောက် စိတ်ထားတတ်အောင် လူတိုင်း ဆင်ခြင်နိုင်ကြပါစေလို့ ဆုတောင်းရင်း…။
- ယိမ်း
0 comments:
Post a Comment